MARIA Á A-LANDSLIÐNUM

06.11.2022

A-landsliðið við kvinnum eru í Kosovo og spæla tveir undandystir til HM-undankappingina móti Kosovo. Bert 18 ára gamla Neistakvinnan Maria Pálsdóttir Nólsoy varð úttikin og er tað fyrstuferð hon er við á ferð við A-landsliðs-hópinum. Maria hevur verið við á øllum ungdómslandsliðunum
og er tað enn.

Føroyska A-landsliðið spældi fyrra dystin móti Kosovo í gjár, hóskvøldið 3. nov. og taptu tær við trimum málum. Seinni dysturin verður leygardagin 5. nov. kl. 18.30 fø. tíð. Kvf.fo stroymir dystin.
Sum fyrireiking hevur landsliðið spælt tveir dystir ímóti Íslandi í Føroyum og endaðu teir báðir við ósigrum, 23-28 og 22-27.

Venjarar eru Sonni Larsen og Finnur Hansson

Neistin ynskir Mariu hjartaliga tillukku við úttøkuni og ynskir henni, leikarunum og venjaratoyminum góða eydnu.

NEISTADAGUR Í SPORT24

GG!!!!
Neistadagurin í Sport24 er fluttur til MÁN. 17. OKT. Kl. 18.00-20.00 Tilboðini eru óbroytt. Síggjast 17. Okt.
 
Sport24 selur Neistaklæðir við 20% avsláttri. Eisini er 20% avsláttur av allari vøru, sum er í handlinum.
Til dagin hevur Sport24 gjørt ein byrjunarpakka.
Pakkin er eitt sertilboð, men tilber eisini at keypa eina ella tvær vørur úr pakkanum. Tit avgerða púra sjálvi.
Í pakkanum er:
Neistadraktin
T-shirt
Short
Ryggsekkur ella taska
(Tit skulu velja antin ryggsekk ella tasku)
Prísur fyri Neista byrjunarpakkan 969,95 kr.
(tit spara 340kr.)
10. oktobur er í heystfrítíðini, so um onkur er burturstaddur
tann dagin, so er møguleiki at fara í Sport24 mán. 17. okt. frá kl. 13-18 ístaðin og bíleggja tykkum Neistaklæðir við 20% avsláttri.
Komið í Sport24 mánakvøldið. Kaffi er eisini á kannuni.

SMS VENJARATOYMIÐ 2022/23

13.09.2022

Stina Madsen heldur fram sum høvuðsvenjari hjá besta kvinnuliðnum hjá Neistanum. Somuleiðis verður trúgvi liðleiðarin Eirikur Magnussen ein partur av toyminum. Neistakvinnur hava fingið nýggjan hjálparvenjara og eisini hevur Neistin sett ein fysioterapeut í starv.

Peter Grove frá Odder í Danmark er nýggi hjálparvenjarin hjá SMS liðnum. Peter er 32 ár og hevur verið venjari í nógv ár bæði á damu og harra síðuni. Peter kemur at hava fleiri uppgávur í felagnum, m.a. at verða venjari hjá G18, G16 og at hjálpa okkara ungdómsmennara Gilla Lorenzen. Peter er komin væl í gongd og heldur uppgávuna verða sera spennandi.

Neistin hevur sett Caroline Olsen í starv, sum fysioterapeut í felagnum. Caroline er 24 ár frá Næstved í Danmark. Caroline skal taka sær av SMS, Burn og ungdóminum. Fyribyrgjandi venjingar og skaðar.

Dejan Lacok heldur fra sum málmansvenjari hjá SMS og Burn.

SMS liðið byrjaði kappingarárið við einum sigri í Vági leygardagin móti VB. Næsti dystur verður hósdagin 15. sep. móti Kyndli.

Neistin ynskir Peter og Caroline hjartaliga vælkomnum í felagið og ynskir venjaratoyminum góða eydnu.

NÝTT VENJARATOYMIÐ

29.08.2022

Neistin hevur sett nýtt venjaratoymið til Burn liðið kappingarárið 2022/23. Ricardo Oliveira og Terji Mørk skulu venja okkara besta manslið. Ricardo verður høvuðsvenjari og Terji hjálparvenjari.

Ricardo er 28 ár og er frá Portugal. Hann hevur væl av venjararoyndum. Hann hevur vant bæði kvinnur og menn, m.a. í 2019 var hann venjari hjá D19 í CPN í Portugal og í 2022 var hann venjari hjá K23 í Colégio De Gaia í Portugal. Ricardo hevur venjaraútbúgving 3. Ricardo kom til landið 15. August.

Terja Mørk kenna tey flestu. Terji er 28 ár og Neistamaður við stórum N. Terji hevur verið venjari á dreingjasíðuni hjá Neistanum í nógv ár. Brennir fyri hondbóltinum og felagnum. Terji hevur spælt á besta mansliðnum hjá Neistanum sjálvur. Hann veit, hvat tað krevur og kennir
virðini hjá felagnum.

Venjaratoymið er komið væl í gongd, har dentur verður lagdur á góða verju og skjótt spæl. Umframt at venja besta liðið skulu Ricardo og Terji taka sær av 1. deild
monnum og D18 saman.

Dejan Lacok heldur fram sum málmansvenjari hjá Burn og SMS.

Neistin ynskir Ricardo vælkomnan í felagið og ynskir
venjaratoyminum góða eydnu.

TVEIR NÝGGJIR LEIKARAR Í SMS HÓPINUM

15.08.2022

Tilgongd er á kvinnuliðnum hjá Neistanum. Kvinnurnar arbeiða hart í løtuni og gera seg til reiðar at byrja kappingarárið 2022/23. Tveir nýggir útlendskir leikarar eru við í hópinum umframt at ein av okkara royndu leikarum er byrja aftur eftir barnsburð.

Neistin fegnast um, at Marjun Danberg er at síggja aftur í SMS hópinum og verður hon uttan iva ein styrkur fyri liðið.
Nuunu M Lukassen er komin úr Grønlandi at spæla hondbólt við Neistanum. 
Hon er vinstra handað, spælir á høgra vongi og hevur spælt hondbólt í 10 ár.
Nuunu er ein partur av Grønlandska landsliðnum. Nuunu er 22 ár, tosar danskt, uppvoksin í Ilulissat, men hevur búð tey seinastu árini í Nuuk. Í 2020 var Nuunu í Danmark og spældi við Nykøbing Falster 2. Div., har hon eisini fekk møguleika at venja við NFH liga liðnum nakrar ferðir.
Bernadett Leiner úr Ungarn er eisini komin til Føroyar at spæla hondbólt við Neistanum. Betti, sum hon verður kallað, er málverji og hevur spælt hondbólt í 13 ár. Hon 23 ár, uppvoksin í Osku í Ungarn og tosar enskt. Betti spældi síni ungdómsár í ALBA Fehérvár KC og spældi við Eszterházy SC frá 2017-2022. Betti fekk prógv sum hondbóltsvenjari í 2022 og verður hon ein partur av málverjuvenjaratoyminum hjá ungdóminum hjá Neistanum.

Nuunu sigur sjálv soleiðis:
Í 2015 flutti eg heimanífrá, tá eg fór til DK á eftirskúla. Flutti síðan til Nuuk, har eg gekk á miðnám á ítróttarlinjuni og spældi hondbólt samstundis. Í 2020 fór eg til Danmarkar at spæla hondbólt, men korona órógvaði so mikið, at eg endaði við at flyta heim aftur til Nuuk, tí alt lukkaði niður.
Eg gleði meg nógv at spæla við Neistanum og vóni at fáa meira dystarvenjing. 
Í Nuuk eru bert tvey hondbóltsfeløg og ber ikki til at ferðast millum hinar bygdirnar og spæla dystir, tí tað er alt ov langt og kosnaðarmikið. Tískil, verða bert tvær hondbóltskappingar spældar í Nuuk yvur eitt vikuskifti um árið.

Betti sigur sjálv soleiðis:
Eg havi glett meg nógv at koma til Føroyar. Tá eg kom til Føroyar, visti eg beinanvegin, at eg var komin á rætta stað. Eg bleiv sera væl móttikin. Øll eru sera blíð og vinarlig her. Oyggjarnar eru ótrúliga flottar. Eg elski longu hettar staðið.
Neistakvinnurnar tóku sera væl ímóti mær og føli eg ein felagsskap, har øll royna at gera sítt besta fyri, at liðið skal klára seg væl. 
Mítt mál er at hjálpa liðnum so nógv sum møguligt. Eg vil gera alt fyri, at vit skulu verða best. Eg eri sera aktiv, eri seriøs, elski hondbólt og eri ein “villur” málverji.
Eg eri sera fegin um at verða í Føroyum og at verða ein partur av Neistanum.

 

Neistin ynskir Nuunu og Betti vælkomnar í felagið og Marjun hjartaliga væl aftur komna. Spennandi verður at koma í høllina at stuðla. Góða eydnu øll somul.

NÝGGJ ANDLIT

12.08.2022

Neistin hevur fingið tveir danskar leikarar heim, sum skulu spæla við Burn liðnum hetta kappingarárið, 22/23. Tobias Wilbek frá Viborg og Simon Pedersen frá Faaborg. Teir báðir kennast. Hava gingið á eftirskúla saman á Hjemly. Tobias og Simon skulu venja D10 hjá Neistanum eisini.

Tobias er 20 ára gamal og hevur spælt hondbólt í Viborg síðan hann var 8 ára gamal. Simon er eisini 20 ára gamal og hevur spælt hondbólt í Faaborg ØH síðan hann var lítil. Tobias og Simon komu til Føroyar 31. Juli og eru longu ein góður partur av hópinum, sum arbeiðir hart í løtuni við at koma í góða venjing bæði hvat viðvíkur styrki, konditión og hondbóltsliga.

Tobias og Simon eru tveir spennandi leikarar. Báðir lættir at samskifta við, seriøsir og eru klárir at arbeiða hart fyri at geva liðnum eitt so gott íkast sum møguligt. Tobias við sínum skjóta fótskifti og góða hondbóltsskili og Simon við við einum góðum eyga og styrki í verjuni.


Tobias sigur sjálvur soleiðis:
Eg njóti longu flottu nátturuna í Føroyum og blíðskapin frá føroyingunum.
Eg gleði meg at spæla við Neistanum, har bæði leikararnir og fólkið rundanum liðið eru sera fyrikomandi og fitt. At skula venja D10 verður ein sera spennandi avbjóðing og eg gleði meg at læra dreingirnar at kenna.
Eg vænti, at Neistin Burnliðið ferð at spæla við millum teir bestu m.a. orsaka av góðum liðanda, sum longu er eyðsýndur.


Simon sigur sjálvur soleiðis:
Neistin sýnist sum eitt seriøst og ambitiøst felag, har stórur dentur verður lagdur á at menna teirra leikarar og hettar tiltalar meg. Eg gleði meg at læra nýggj fólk at kenna. Vóni, at menna meg sum hondbóltsspælara og vóni, at tíðin í Føroyum sum heild verður ein góð uppliving at taka við í mínum lívi.
Eg vænti, at Neistin Burnliðið verður við í endaspælinum og kunnu gera seg galdandi í toppinum, so fáa vit at síggja, hvat hendir. Alt kann henda í hondbólti.........


Neistin ynskir Tobias og Simon hjartaliga vælkomnum í felagið og ynskir teimum
góða eydnu.

Tobias Wilbek er leikarin vinstrumegin á myndini og Simon Pedersen høgrumegin.