Tíðindi

Høvuðsvenjari hjá fremsta mansliði komandi kappingarár

Jónleif Sólsker, ið er eitt kent andlit í føroyskum ítrótti, bæði í hond- og fótbólti, tekur við sum nýggjur høvuðsvenjari hjá fremsta mansliðnum komandi kappingarár. Í honbólti hevur hann spælt 406 dystir og skotið 1745 mál við Kyndli. Jónleif hevur eisini spælt við VÍF og StÍF.

Jónleif hevur drúgvar royndir í hondbólti, bæði sum spælari, venjari og spælandi venjari. Hann hevur verið venjari hjá Kyndli, VÍF og í tveimum umførum hjá StÍf. Nú fer Neistin at fáa gagn av hansara drúgvu royndum.

Vit eru sera væl nøgd við, at Jónleif tekur við avbjóðingini. Vit kenna jónleif sum ein ábyrgdarfullan venjara, ið tekur sítt arbeiði við tí álvara tað krevur og megnar at fáa sum mest burtur úr teimum spælarum, hann hevur til taks.

Vit bjóða Jónleifi hjartaliga væl komnum og góða eydnu í nýggja leiklutinum.

Samstarvið millum Neistan og Paula Joensen er steðgað

Samstarvið millum Neistan og Paula Joensen, høvðusvenjara hjá fremsta kvinnuliði felagsins, er steðgað

Neistin harmast um støðuna, men virðir avgerð høvuðsvenjarans. Pauli kemur sostatt ikki at taka sær av liðnum til FM finalurnar komandi dagarnar. Neistin takkar Paula fyri tíðina og góðu úrslitini, hann hevur rokkið saman við fremsta kvinnuliði felagsins og ynskir Paula blíðan byr framá.

Flemming Raben og Sigrun Mikkelsen standa á odda fyri fremsta liðnum til finalurnar.

Menninir hildu tørn

Kollifirðingar góvu okkum skarpan gang, men vit hildu tørn, tá menninir aftur komu ígongd við landskappingina

Tað var ein vandi, at harði dysturin og herskna tapið frá steypafinaluni sat í beinunum hjá okkara monnum, tá teir í kvøld tóku ímóti KÍF. Men um seg var, so krógvaðu teir tað sera væl.

Talan var fyri tað mesta um sera javnan dyst, men stutt undan hálvleikinum vunnu vit okkum eitt sindur framum.

Leiðslan varð alt fyri eitt útbygd eftir steðgin, men tá gestirnir skoraðu fýra ferðir á rað, stóð brádliga nógv á hjá okkum. 

Eitt skifti hóttu teir enntá við at fara avstað við øllum, men tíbetur fingu vit aftur fatur á rætta endanum. Og seinastu fimm minuttirnar lupu vit nógv væl avstað, soleiðis at leiðslan kundi haldast á mál

Talan gjørdist soleiðis um tvey stig, og tey bera við sær, at vit framvegis hava nógv at spæla fyr. Kanska er finalusessurin dekan ov langt burturi, men framstigini hjá okkara monnum eru eyðsýnd, og munnu vit vera eitt sindur stabilir, kunnu vit kanska ota okkum fram á bronsuplássið.

Neistin-KÍF 29-28 (16-14)

Málskjúttar hjá Neistanum: Rói Berg Hansen 9(5), Andras Joensen 4, Tommy Fletcher 4, Torkil Hentze 4, Teitur Magnusson 2, Aleks Buha 2, Terji Mørk 2, Hjalti í Jákupsstovu 1, Kristjan Dulavík 1

Stórsigur hjá kvinnunum

Tað var kanska ikki so galið, at vit komu ígongd eftir steypasigurin við tí á pappírinum lættasta dystinum. Nevnliga heimadyst móti Søljuni, sum enn hevur fyrsta stigið í deildini tilgóðar.

Ikki tí, framstigini hjá vágaliðnum hava verið stór hetta kappingarárið, og enn er eingin dystur vunnin, fyrr enn hann er spældur.

Tað vísti seg tíbetur, at okkara kvinnur høvdu gloymt steyparúsin, og frá byrjan settu vit okkum totalt á dystin. Søljan slapp ongan tíð at geva okkum nakrar sum helst trupuleikar, og gott var at síggja allar spælarar fáa nakað av tíð á vøllinum.

Komandi vikuskifti hava vit frí, men so verður aftur herja, tá StÍF kemur á vitjan.

Neistin-Søljan 38-12 (19-5)

Málskjúttar hjá Neistanum: Bára Hansen 11(3), Birita Jacobsen 8, Jacklin Durhuus 5, Marjun Danberg 4, Lilja Mohr 2, Nicoleta Hansen 2, Súsanna Nólsoy 1, Selma Dahl 1

Akkurát ikki

Stórfavorittarnir vinglaðu, men vit kláraðu akkurát ikki at geva teimum avgerandi slagið, sum kundi sent teir í gólvið

Eingin sum helst ivi var um, at vit vóru underdogs, tá mansfinalan var á skránni leygardagin.

VÍF hevur fyri tað mesta smurt mótstøðuliðini av í vetur, og tað hevur í tveimum førum gingið útyvir okkum. Men hinvegin høvdu vit eisini bankað teir gulu mest sum bláar tað einu ferðina, so heilt ómøgulig var uppgávan kanska ikki.

Og fyrstu minuttirnir av finaluni prógvaðu, at eru menn uppsettir og vilja arbeiða fyri sakini, so ber tað mesta til. Sjúrður var flúgvandi í álopinum. Verjan stóð sum ein múrur, og í málinum vísti Mikkjal eftirhondini vanliga stórspælið.

Mótstøðan var skelkað, men tó ikki meira enn so, at vestmenningarnir spakuliga arbeiddu seg aftur í dystin. Ikki minst kundu teir takka ungu Julian Olsen og Áka Egilsnes fyri, at so varð, og stutt undan steðginum komu teir upp á javnt.

Vit fingu tó ein kassa afturat fyri hálvleik, men eftir eina løtu av seinna hálvleiki tóktist tað, sum hevði favoritturin tikið yvir. Einki riggaði hjá okkum, og Áki valdi óvanliga tíðliga at brúka grøna kortið, so skil kundi fáast á spælið.

Og hetta riggaði. VÍF slapp ikki longur at renna avstað, og seigliga ótu vit okkum aftur í dystin. Varð spælt í 65 minuttir, so høvdu vit helst eisini tikið okkum stavnin framum, men vit taptu kapprenningina ímóti tíðini. Ta einu ferðina komu vit upp á javnt, men VÍF svaraði aftur. Og hóast teir gulu ikki skoraðu í teimum báðum seinastu álopunum, so gjørdu vit tað heldur ikki, og so kundu vit bara ásanna, at talan gjørdist um eitt av hesum heiðurligu tapunum.

Tó so. Nøkur tap eru avgjørt meira heiðurlig enn onnur. Okkara menn góvu alt, og tað er avgjørt eingin skomm at tapa tepurt móti einum stórfavoritti. Bæði gulir og bláir áskoðarar fingu sjón fyri søgn, at vit hava ein hóp av sera evnaríkum spælarum, sum seinnu árini hava verið ígjøgnum eina velduga menning. Heldur hendan fram, so ganga heilt víst ikki nógv ár, áðrenn steypið aftur fer at finna vegin fram í Neista-hølini.

Neistin-VÍF 25-26 (13-12)

10 min: 6-3
20 min: 9-7
40 min: 15-18
50 min: 20-22

Málskjúttar fyri Neistan: Sjúrður K. Thomassen 9, Tommy fletcher 8, John í Innistovu 2, Jugoslav Djumic 2, Carl Herup Olsen 1, Teitur Magnusson 1, Terji Mørk 1

Steypagull til kvinnurnar

Øll órógv í upptaktini til finaluna varð løgd til viks. Kvinnurnar hildu fult fokus á uppgávuni, og úrslitið gjørdist ein sannførandi finalusigur móti Kyndli

Seinasta vikan var fyri tað nógva merkt av rumbli um kvinnurnar hjá okkum. Málið um reyða kortið hjá Biritu og málið um vantandi undantaksloyvið hjá Elisabeth hava verið ovast á tíðindabreddanum gjøgnum alla vikuna. 

Ikki fyrr enn hóskvøldið vistu okkara kvinnur, at tær vóru annar parturin í steypafinaluni, og tí er einki at siga til, um tær hava kent upptaktina eitt sindur ófriðarliga við fokus á øllum møguligum øðrum enn dystinum sjálvum.

Í finaluni stóð tó skjótt greitt, at spælararnir hvør sum ein høvdu brúkt øðina, sum stóðst av øllum rumblinum, á rættan hátt.

Fyrsta løtan var kanska dekan ov  nógv merkt av nervum hjá báðum pørtum, men hesir hvurvu eftir 10 minuttum ella so, og tá settu vit okkum á dystin.

Størsta partin av fyrra hálvleiki var Fríða átøk einum livandi múri í málinum. Í álopsspælinum riggaði sera væl at spæla Millicu upp, og longu áðrenn farið varð til hálvleiks, hevði Kyndil gjørt av at mansverja hana. Viðvirkandi til frálíku gongdina hjá Milicu var tó eisini, at bæði Birita og Jacklin skoraðu úr spískum, og tí bar ikki til hjá teimum grønu at kroysta verjuna ov nógv saman.

Eitt skifti í fyrra hálvleiki vóru fimm mál á muni, og hóast Kyndil fekk togað seg aftur í dystin, so eydnaðist tað teimum ongan tíð aftur at kvetta munin niður um tvey mál. Við konstantari mansverju var einki at siga til, at álopið hjá okkum ikki koyrdi eins flótandi eftir steðgin, men týdningarmiklu málini komu, hvørja ferð munurin hevði hug at tódna.

Birita og Eir skoraðu báðar úr spískum frá høgra veingi, og tá vit so fingu møguleikan móti dystarenda, skræddu vit okkum avstað. Kyndil royndi nú at taka bæði Milicu og Báru úr spælinum, og so kundi Jacklin veruliga dusað sær við síni gjøgnumbrotsstyrki. Tær fýra, sum eftir vóru í grønu verjuni, vórðu skræddar sundur og saman seinastu løtuna, og so stóðu sannførandi 24-19 á talvuni, tá seinasta bríkslið ljóðaði. 

Ein sannførandi sigur, sum ikki bara prógvar, at Neistin er steypavinnari hjá kvinnum. Hann prógvar eisini, at vit her hava ein bólk av spælarum, sum ikki gevur seg fyri nøkrum sum helst, og tað ber í øllum førum góð boð fyri restina av landskappingini.

Neistin-Kyndil 24-19 (11-9)

10 min: 2-2
20 min: 8-4
40 min: 14-12
50 min: 19-16

Málskjúttar hjá Neistanum: Milica Rankovic 11(2), Jacklin Durhuus 5, Birita Jacobsen 4, Bára Hansen 2, Eri M. Berg 1, Nicoleta Hansen 1

So spæla vit á vøllinum

Grannauppgerð í Høllini á Hálsi

Kvinnurnar eisini í finaluni

Menninir eru í finaluni

Rópið á liðini enn einaferð til finalurnar

Einki avgjørt!

Munurin kundi verið størri

Rópið liðini til finalurnar

Steypadystur hjá monnunum og kvinnunum

Oddaliðið fekk bank

Stórsigur í lykladystir

Týðandi útisigur

Mistu sigurin

Blátt er gott :-)

Kunnandi fundur um Gundadalshøllina

David fekk ov nógv

Ein flúgvandi David Edvardsen var høvuðsorsøkin til, at Kyndil hesa ferð vann mansuppgerðina.

Tað var um reppið, at okkara menn enn einaferð spældu grønu grannunum eitt puss. Tað hava vit gjørt rættiliga ofta seinnu árini, og eingin ivi er um, at tað hevur nívt hjá grannunum, sum gjarna vilja hava leiklutin sum sjálvútnevndir FM-favorittar.

Sunnudagin varð talan enn einaferð um sera javnan dyst. Hjá Kyndli var tað David Edvardsen, sum støðugt togaði mál í teirra part, men vit høvdu so sanniliga eisini okkara vápn. Rói var kvikur, tá møguleiki var fyri kontra, og Tommy hevur longu prógvað, at hann er stór hóttan av bakkinum.

Fram til seinastu 10 minuttirnar var tað hips um haps, hvør skuldi fara avstað við sigrinum, men tá Kyndil brádliga skoraði tríggjar ferðir á rað, fingu teir avgerandi takið. Vit fingu minkað munin niður í eitt mál, men tá David so aftur skoraði í seinasta minuttinum, kundu vit staðfesta, at tað altso ikki gekk hesaferð.

Hugurin at stríðast er framvegis stórur hjá okkara monnum, og enn sum áður er tað menning av einstøku spælarunum og av liðnum sum heild, ið stendur á skránni. Her hava vit flutt okkum nógv seinastu tvey árini, og tað er at vóna, at tann gongdin eisini stendur við komandi mánaðirnar.

Neistin-Kyndil 23-25 (13-13)

Málskjúttar hjá okkum: Rói Berg Hansen 8, Tommy Fletcher 7, Aleks Buha 3, Jugoslav Djumic 2, Terji Mørk 2, John í Innistovu 1

Góvu ikki upp

Tað líktist aftur einum tapi móti Kyndli, men kvinnurnar hjá okkum stríddu seg upp á javnt, tá tað sá svartast út.

Seinasta hálvaannað árið hava vit havt tað heldur trupult móti Kyndli. Í fjør fóru grannarnir avstað við øllum, og tvær ferðir fyrr í ár hava vit verið við undirlutan.

Sunnudagin tóktist hetta aftur skula verða úrslitið. Í 50 minuttir ella so var tað Kyndil, sum stýrdi dystinum, og ikki minst var tað dýrt, tá vit rættiliga mistu høvdið seinasta partin av fyrra hálvleiki. Tá vann Kyndil sær eina trivaliga leiðslu, og so var brekkan brøtt hjá okkum, tá vit fóru út til seinna hálvleik.

Og júst tí var tað eisini gleðiligt at síggja, hvussu stríðshugaðar okkara kvinnur vóru eftir steðgin. Tað sá einki serligt út, og Kyndil hevði als ikki hug at tveita leiðsluna burtur, men treiskni hjá okkum gav at enda úrslit.

Seinastu 7-8 minuttirnar kvettu vit leiðsluna burtur, og vit komu upp á 24-24. Men tá Milica fekk reytt og Kyndil skoraði upp á brotskast, sá einki serligt út. Men tað løgdu kvinnurnar á vøllinum líka í. Tað eydnaðist at fanga næsta Kyndils-álopið, og so kundi Jacklin javna til endaliga úrslitið, 25-25.

Javnleikurin ber við sær, at vit halda fast um oddasessin í deildini. Men tað er als eingin orsøk at taka tað róliga fyri tað. Sera tætt er millum fýra tey ovastu liðini, og tað gongur tann vegin, at tað verða teir heilt smáu marginalarnir, sum gera av, hvørji tey bæði finaluliðini verða, tá vit nærkast páskunum. Fram til tá eru tó nógvir dystir eftir at spæla, og vit skulu minnast til, at marginalarnar fært tú bara, um tú berjist fyri teimum.

Neistin-Kyndil 25-25 (12-17)

Málini hjá okkum skutu: Eir Berg 7, Birita Jacobsen 5, Milica Rankovic 5, Jacklin Durhuus 3, Súsanna Nólsoy 1, Lilja Mohr 1, Birita Wardum 1, Nicoleta Hansen 1

Komið øll . . .

I kvøld eru heimadystir a skránni hja bæði kvinnum og monnum.
Kl 18.30 spæla kvinnurnar ímóti Stjørnuni
Kl 20.00 spæla mennirnir ímóti H71

Emil Dam til Neistan

Vit hava fingið enn ein klassa málmann í felagið, og við hesum hava vit nú helst bestu málmannsduo spælandi í bláum. Emil Dam hevur gjøgnum fleiri ár víst sínar dygdir á einum sigursvandum KÍF liði. Emil hevur verið smáskaddur seinastu tvey árini, men er nú klárur aftur. Vónandi hevur hann enn evnini at koma inn og standa stinnur, tá tað leikar harðast á. Eitt er vist: Við báðum nýggju leikarunum, sum styrkja liðið, eru vit brynjaði til at spæla um finalupláss í báðum kappingunum.

Avstralskur landsliðsleikari til Neistan

Vit hava fingið ein nýggjan leikara á liðið og hann spælir við ímóti H71 í morgin. Hann eitur Tommy Russel Fletcher, er 24 ár, hevur svenska mammu og avstralskan pápa. Hetta gevur honum rætt at spæla á avstralska landsliðnum og tað hevur hann gjørt, síðani hann var 18 ár. Hann hevur millum annað verið við til HM tvær ferðir. Vit meta, at hann kann geva liðinum tann stabilitetin, sum tað manglar, og kann vera við til at náa tey mál, sum Neistin hevur sett. Vit ynskja Tommy vælkomnum í Neistan og gleða okkum at síggja hann spæla í bláum.

Foreldrafundir í ungdómsdeildunum

Komandi týsdag, hósdag og mánadag verður skipað fyri foreldrafundum hjá øllum ungdómsliðunum. Foreldrafundir eru eitt gott høvi hjá venjararum, foreldrum og nevnd at hittast og hoyra hvussu venjingin verður skipað og hvørjar uppgávur liggja fyri framman. Uttan hjálp og stuðul frá foreldrunum, er torført at mennað eitt stórt felag sum Neistin. Um vit øll vísa áhuga og hjálpa til á ymiskum økjum, røkka vit langt! 

Tíðirnar foreldrafundirnir eru, eru hesar:

Týsdag 4.nov (Kantinan Høllin á Hálsi)
kl.16.15 til 17.00, G12
kl.17.00 til 17.45, G10
kl.18.00 til 18.45, G14
kl.19.00 til 19.45, G17

Hildu fast… og byrjanin kostaði dýrt!

Kvinnurnar:

Hóast StÍF argaði, so vunnu kvinnurnar hjá okkum tvey stig sunnudagin. Á pappírinum vóru okkara kvinnur greiðir favorittar, men tað er nú ikki altíð, at pappírið er so eftirfarandi. Fyrstu løtuna av dystinum var í øllum førum ikki nógv, sum bendi á, at nakar greiður favorittur var at síggja í dystinum. Um nakað, so var tað StÍF, sum hevði betra takið, men undan steðginum megnaðu vit tó at toga okkum framum. Eftir steðgin komu óvanliga fá mál fyrstu longu løtuna. Fyri okkum var tað frustrerandi at síggja, at tað bert komu trý mál frá okkara í eitt korter, men tá hinar bara fingu tvey av slagnum, so var skaðin ikki so stórur. Seinasta korterið fingu vit aftur ferð á. Bára og Nico gingu á odda, og so gjørdist talan í seinasta enda um ein sigur, sum á pappírinum gjørdist nógv greiðari, enn hann tóktist vera á vøllinum.

Neistin-StÍF 22-17 (12-10)

Málskjúttar hjá Neistanum: Bára Hansen 6, Milicia Rankovic 5, Lilja Mohr 2, Birita Wardum 2, Nicoleta R. Hansen 2, Annika Thomsen 2, Eir Berg 2

Mennirnir:

Móti StÍF vóru vit ikki reiðiliga vaknir, tá dysturin byrjaði, og tað kostaði í seinasta enda. Fleiri ferðir fyrstu umførini hava menninir koppað tøttum dystum, soleiðis at stigini eru komin rætta vegin. Men tann gongdin helt ikki fram, tá StÍF vitjaði okkum um vikuskiftið. Og tað var fyrst og fremst fyrsta løtan av dystinum, sum kostaði í so máta. Vit drógu púrasta svart í einar sjey minuttir, og tá høvdu gestirnir longu runnið avstað. Spakuliga royndu vit at stríða okkum aftur í dystin, og vit megnaðu eisini at koma upp á javnleikin í trimum førum. Men nærri enn tað sama komu vit ikki. Tað kostar nógvar kreftir, um tú ert fleiri mál aftanfyri og skalt vinna teg aftur, og saman við frálíka góðum málmansspæli frá gestunum var hetta nóg mikið til at forða fyri, at nøkur stig spurdust burtur úr hesari royndini hjá okkum.

Neistin-StÍF 22-23 (9-12)

Málskjúttar hjá Neistanum: Terji Mørk 5(3), Sjúrður Thomassen, 4, John í Innistovu 3, Andreas Joensen 3, Rói Berg Hansen 3, Jugoslav Djumic 3, Teitur Magnusson 1, Torkil Mørk Hentze 1

Kvinnurnar halda eisini fast um oddasessin

Sum hjá monnunum í gjár, vóru vit øll eitt sindur spent uppá, hvussu mundi fara at gangast okkara kvinnum suðuri í Vági, í dag. Vit vita øll, at tað er altíð trupult at vinna í Vági, tað skal ein eyka innsatsur til. Og sigast skal, at hetta vístu Neistakvinnur okkum í dag. Úrslitið gjørdist 31-25 til Neistakvinnur. Tað mesta av dystinum vóru okkara kvinnur omaná og sum tað ljóðar, vístu okkara kvinnur betri verjuspæl og betri skipað álopspæl. Stuttligt at síggja eitt lið kempa fyri sigurin og vísa viljan at vinna!

Málini skutu: Milicia Rankovic 10 (4), Jacklin Durhuus 8, Birita Wardum 5, Eir Berg 4, Bára Hansen 2, Lilja Mohr 1, Nicoleta Hansen 1

So byrjar minihondbóltur aftur í morgin kl.17.00

Nú heystferian er av, byrjar minihondbólturin hjá Neistanum aftur.

Í ár verða vit í Skúlanum við Løgmannabreyt

• mánadag kl. 17.00 til 18.00

Minihondbóltur er fyri børn í aldrinum 3 til 6 ár

Vælkomin børn og foreldur :)

Halda fast um oddasessin

Tað er helst eitt sindur óvæntað, og sjálvi eru vit gleðiliga bilsin. Men veruleikin er, at mansliðið hjá Neistanum heldur fast um oddasessin í landskappingini, nú vit hava spælt fimm dystir. Í dag vitjaðu okkara menn í Klaksvík, har Team Klaksvík hevur sveiggjað sera nógv í ár. Tí vistu vit ikki reiðiliga, hvat vit skuldu vænta, men vónirnar vóru í øllum førum til tvey stig, og tey fingu vit. Tað var fyrst og fremst orkan, sum var á muni í dag. Fyrstu longu løtuna av fyrra hálvleiki var munurin ikki tann stóri, men seinasta korterið undan steðginum sást, at okkara menn eru sera væl fyri og vísa veruliga gott hondbóltsspæl, bæði í álop og verju. Frá 6-5 broyttist støðan til 10-16, og so var nokk eingin ivi um, hvønn veg tað bar. Eftir steðgin var eingin ivi um, at stigini skuldu okkara veg. Eitt skifti var munurin níggju mál, men tá vit slakaðu nakað seinastu løtuna, kundu klaksvíkingar pynta um úrslitið, men meira enn tað. varð talan ongan tíð um.

Team Klaksvík-Neistin 22-28 (10-16)

Málskjúttar hjá Neistanum: Andras Joensen 5, Rói Berg Hansen 5, Jugoslav Djumic 5, John í Innistovu 4, Teitur Magnusson 4, Terji Mørk 3(2), Aleks Buha 2

Kvinnurnar mátti lúta fyri Kyndli! og Mennirnir tapa ikki grannauppgerðir

Tað eydnaðist ikki kvinnunum hjá okkum at halda fast um oddasessin, tá vit í gjárkvøldið skuldu royna okkum móti Kyndli. Sum verjandi greipuvinnarar verður Kyndil sjálvandi roknað millum sterkastu liðini í landinum, men skulu vit spæla upp við tey bestu, so skulu vit eisini hava stig frá øðrum favorittum. Serliga vóru tað seinastu 10 minuttirnir undan steðginum, sum vóru dýrir fyri okkum. Kyndil hevði hug at toga seg framum hesa løtuna, og tá ein yvirtalsstøða hjá okkum endaði málleys, sluppu tær grønu at toga seg enn longur burtur. Munurin varð øktur upp í 4 mál, og tað var meira, enn vit megnaðu at svaraðu aftur. Allan seinna hálvleik runnu vit aftaná, og so máttu vit at enda bara ásanna, at á degnum vóru tað grannarnir, sum høvdu takið. Men munurin var nú ikki meira enn so, at tað væl kann spæla øðrvísi av, tá vit hittast aftur.

Kyndil-Neistin 30-26 (13-9)

Málini hjá okkum skutu: Jacklin 8, Milica 5(1), Bára 3 (1), Nico 3, Birita J. 2, Annika 2, Birita W 2, Ása 1

Tapa ikki grannauppgerðir

Tað er eftirhondini heilt langt síðani, at menninir hjá okkum hava tapt ein landskappingardyst móti Kyndli. Tað kann væl vera, at teir grønu aftur í ár eru stórfavorittar í lokal-uppgerðunum á Hálsi, men enn sum áður fáa vit stig fyri dystirnar. Tað stóð annars nógv á hjá okkum seinasta korterið. Dysturin var fyri tað nógva sera javnur, og báðar verjurnar gjørdu tað trupult hjá mótstøðuni at sleppa framat máltalvuni. Vit tóktust tó hava eina lítla yvirvág, men tá vit fyrst høvdu yvirtalsstøðu uttan at skora, og Kyndil løtu seinni brúkti sítt yvirtal til at skjóta trý mál, sá meira enn svart út hjá okkum. Tá vísti talvan 18-16, og einir 7 minuttir vóru eftir at spæla, men hesar sjey minuttirnar reistust okkara aftur. Kyndil slapp als ikki framat. Mikkjal vísti allan dyst gott spæl, og tað helt hann eisini fast um seinastu avgerandi minuttirnar, og við góðum minutti eftir høvdu vit strítt okkum til javnleik. Vit fingu enntá eitt álop afturat, har vit kundu tikið stikkið fullkomuliga, men tað gekk so heldur ikki. Men avgjørt eitt góðkent úrslit, og eitt meira enn góðkent avrik frá okkara monnum.

Kyndil-Neistin 18-18 (9-8)

Málini hjá okkum skutu: Rói 4, Terji 4(2), Andrass 3, Teitur 2, Djumic 2, Jón 1, Sjúrður 1, Herbjørn 1

Stórsigur til kvinnurnar, meðan mennirnir vórðu revsaðir hart

VÍF kvinnurnar fingu ikki eitt bein til jørðina, tá tær vitjaðu í dag. Okkara kvinnur vunnu nevnliga greiðan sigur, og tað var longu fyrstu løtuna, at lunnar vórðu lagdir undir hendan. Longu eftir trimum minuttum tók bonkurin hjá VÍF time-out. Tá var støðan 5-1 til okkum, og ta ðeydnaðist ongantíð VÍF at fáa fatur á okkum aftur. Sum fyrri hálvleikur leið, bara øktu vit um leiðsluna, og hóast ferðin dalaði nakað eftir steðgin, so var sigurin á ongan hátt í vanda. Soleiðis hava vit nú fýra stig fyri teir báðar fyrstu dystirnar, og hóast tað framvegis er langur vegur á mál, er ein góð byrjan ikki at forsmáa.

Neistin-VÍF 34-22 (21-12)

Málini hjá okkum skutu: Milica 8(1), Nicoleta 6, Liljan 5, Jacklin 3, Birita W 3, Bára 2(2), Birita J 2, Tórhalla 2(2), Selma 2, Annika 1

Menninir hjá okkum taptu stórt fyri VÍF í dag. Talan var annars um javnan dyst fyrstu 20 minuttirnar, men so gekk heilt galið. VÍF leyp avstað undan steðginum, og fyrstu 11 minuttirnar eftir steðgin skoraðu vit als ikki, meðan gestirnir mest sum skoraðu eftir vild. Tað bar við sær, at allur spenningur í dystinum í var burtur, og hóast vit aftur fingu nakað av glið á spælið, so var hetta bara til at pynta um úrslitið.

Neistin-VÍF 16-32 (9-14)

Málini hjá okkum skutu: Andras 5, Herbjørn 3, Djumic 3, Terji 3, Aleks 1, Rói 1

Fyrsta korterið eftir steðgin gjørdu okkara menn av við sigursvónirnar hjá H71

So er hondbólturin aftur ígongd. Og bæði hjá monnum og kvinnum varð talan um ein fínan bláan dag. Menninir spældu í Hoyvík, har vit fleiri ferðir fingu fín úrslit í fjør. Og í so máta tóku vit við, har vit sleptu, tí tað eydnaðist okkum nevnliga at vinna dystin.  Avgerandi løtan í dystinum var fyrsta korterið eftir steðgin. Fyrri hálvleikur var annars rættiliga javnur, og tá stóð 12-13 á talvuni. Bara 19 minuttir seinni stóð 14-25, og so var ikki so nógv meira eftir at spæla um. Tað eydnaðist vertunum at minka um munin, tá okkara ikki løgdu heilt so nógv fyri seinastu 10 minuttirnar, men sigurin kom á ongan hátt í vanda. 

Málini hjá okkum skutu Rói (5), Andras (4), Torstein (4), Terji (4), Teitur (3), Djumic (3), Aleks (3) og Herbjørn (1)

Kvinnurnar spældu í Klaksvík, og har var eingin ivi um úrslitið. Tær vunnu stórsigur 36-16!

Til lukku til bæði kvinnur og menn

Kyndil - Neistin

Lions Føroyar fara framyvir at skipa fyri stórsteypadystunum, sum fara at eita dystirnir um Lionsbikarið. Í ár eru dystirnir í høllini á Hálsi sunnudagin 21. september. Liðini sum skulu spæla eru:

Kvinnur: 
Kl. 17.00 Kyndil (sum meistari) – Neistin (sum varasteypavinnari) 

Menn:
Kl. 19.00 KÍF (sum meistari) – Kyndil (sum steypavinnari)

Spælt verður um Lionsbikarið í 10 ár, tá tað felagið, sum hevur vunni oftast, eigur steypið til ognar. Stendur á jøvnum millum tvey ella fleiri feløg tá 10 ár eru liðin, verður spælt til okkurt felag hevur vunni steypið oftari enn øll hini.

Kaffi og okkurt søtt undir tunguna verður sjávandi eisini at fáa í kantinuni, sum Neistin stendur fyri í ár.

Síggjast

Ársaðalfundur

Karsten Hansen, Kári Horn og Mona Ziskason komu í nevndin. Úr nevndini fóru Kristianna Mohr, Edel Maria Jacobsen og Guðrun Patursson. Bæði Karsten og Kári sótu áðrenn sum tiltakslimir, og skuldu sostatt tveir nýggir tiltakslimir veljast. Hesir eru nú Andrea Hendriksdóttir og Barbara Høj

Nýggja nevndin hevur skipað seg og sær hon so soleiðis út:

• Kjartan Thomassen, formaður
• Súna Mørk, næstforkvinna
• Kári Horn, kassameistari
• Mona Ziskason, skrivar
• Karsten Hansen, nevdarlimur.

Vit takka Kristionnu, Edel Mariu og Guðruni fyri tíðuna tær hava sitið í nevnd og ynskja Karsten, Kára og Monu vælkoman

Venjingartíðirnar á heimasíðuni

NeistaSTÓRfundur

Mikudagin 27. august kl. 18 í verður fundur í kantinuni í Høllini á Hálsi. Endamálið við fundinum, sum hevur fingið heitið NeistaSTÓRfundur, er at samansjóða kreftirnar í felagnum, at semjast um ítøkilig mál at røkka og at persónar átaka sær ábyrgd av at gera tað, sum skal til, fyri at koma á mál. Fundurin er fyri øll neistafólk, tað verið seg leikarar, venjarar, stuðlafelagslimir, foreldur – ella stutt sagt, øll sum hava eitt blátt hjarta!

Skráin:

Kl. 18.00 Felags máltíð
Kl. 18.30 Framløga
Kl. 19.00 Viðgerð/arbeiði í bólkum/orðaskifti
Kl. 22.00 Liðugt

Meira verður kunnað um NeistaSTÓRfundin seinni.

Nevnd Neistans