Lógir
§ 1. Navn og heimstaður
Navn felagsins er Stuðlafelagið NEISTIN, og heimstaður felagsins er Tórshavn.
§ 2. Endamál
Endamál felagsins er at stuðla Hondbóltsfelagið Neistan.
§ 3. Limaskapur
Limaskapur er opin fyri øllum viðhaldsfólkum Neistans og fæst við at venda sær til nevnd felagsins, góðkennast av nevndini, og gjalda limagjald. Fyri at hava luttøku- og atkvøðurætt á aðalfundi felagsins, skal viðkomandi vera skrásettur sum limur í minsta lagi 1 mánaða undan aðalfund.
§ 4. Skipan
Hægsti mynduleiki felagsins er árligi aðalfundurin, ið hildin verður sambært §5 í seinasta lagi 3 mánaðir eftir roknskaparenda. Boðað verður til fundar 14 dagar frammanundan, antin við brævi ella við lýsing. Fundarskráin verður fráboðað saman við fundarboðunum. Avgerðir á aðalfundi og eykaaðalfundi verða gjørdar við vanligum meirluta. Fundurin avger, um atkvøðugreiðslan skal vera skrivlig ella við handsupprættan.
Roknskaparár felagsins gongur frá 1. mai til 30. apríl.
§ 5. Aðalundurin
Aðalfundurin verður hildin eftir hesi skrá:
- Val av fundarstjóra og skrivara.
- Formaðurin/-kvinnan greiðir frá farna ári.
- Grannskoðaður roknskapur verður lagdur fram til samtyktar.
- Møgulig uppskot frá nevndini og/ella limum felagsins.
- Val av nevnd. Nevndin telur 5 limir. Annaðhvørt ár verða valdir 2, og annaðhvørt 3. Nevndarlimur í Stuðlafelagnum Neistanum kann ikki vera valdur nevndarlimur í Hondbóltsfelagnum.
- Val av grannskoðara.
- Ymiskt.
§ 6. Nevndin
Nevndin skipar seg sjálv, tá ið aðalfundurin er av, við formanni/-kvinnu, skrivara og kassameistara. Nevndin ásetur sjálv arbeiðssetning fyri virksemi sínum.
§ 7. Eykaaðalfundur
Boðað verður til eykaaðalfundar, tá ið meirlutin av nevndini ella 10 limir biðja um tað.
§ 8. Lógarbroytingar
Lógarbroyting kann bert fara fram á aðalfundi ella á eykaaðalfundi. Fyri at fáa gildi skal lógarbroyting vera samtykt av minst 3/4 av limunum møttir á aðalfundi.
§ 9. Uppathald
Til at taka felagið av krevst samtykt á aðalfundi. Í minsta lagi helvtin av limum felagsins skulu vera møttir á fundi, og í minsta lagi 3/4 av møttum limum skulu atkvøða fyri at taka felagið av. Heldur felagið uppat, fella møguligar ognir felagsins til Hondbóltsfelagið Neistan.
Soleiðis broyttar og góðkendar á ársaðalfundi 27. juni 2014.