Category: Tíðindi

Eftir at hava spælt hondbólt uttanlands í nøkur ár, kemur Rói Berg Hansen heim aftur til Føroyar – til Neistan – at spæla.

Rói Berg Hansen hevur verið partur av uppbyggingini av manslandsliðnum, sum júst hevur spælt EM í Oslo. Saman við øðrum góðum ungum monnum var hann partur av ungdómslandsliðnum, sum m.a. gjørdu vart við seg til U21-HM í Algeria í 2017. Síðani er tað blivið til tvey endaspøl fyri A-landslið – EM í Berlin í 2024 og síðani EM í Oslo í 2026.

Vinstri vongurin á landsliðnum, sum er uppvaksin hjá Neistanum, fór uttanlands at menna seg sum hondbóltsleikara eftir góðu úrslitini hjá U21-landsliðnum í Algeria. Fyrst til FIF, síðani til Høj Elite og í løtuni spælir hann í Køge.

Eftir summarfrítíðina kemur Rói heim til Neistan við skjáttuni fullari av góðum hondbóltsroyndum og førleikum. Umframt at vera yrkisleikari, lesur Rói eisini námsfrøði. Rói fer við sínum góðu hondbóltsevnum og námsfrøðiligu útbúgving at styrkja besta mansliðið hjá Neistanum, samstundis sum hann eisini leggur lunnar undir komandi ættarliðini hjá bæði kvinnum og monnum.

Neistin er millum størstu hondbóltsfeløg í landinum. 550 børn, ung og vaksin spæla hondbólt hjá felagnum. Harafturat er ein herur av venjarum, sjálvbodnum og onnur knýtt at felagnum. Hetta er ein stór ábyrgd, sum Neistin tekur í størsta álvara. Tí brynjar felagið seg til framtíðina og arbeiðir miðvíst fyri, at Neistin skal vera Føroya besta og fremsta hondbóltsumhvørvi.

Starvið hjá Róa er fulltíðarstarv og liður í hesi menningini og framtíðartrygging av Neistanum. Høvuðsuppgávurnar hjá Róa eru at vera styrkivenjari hjá ungdóminum, vera venjari hjá børnum og ungum umframt at spæla við besta mansliðnum.

Hendan menningin ber bara til við vælvild frá kommununi, hollum stuðlum og øllum teimum sjálvbodnu, sum vilja og velja felagsskapin. Eina hjartans tøkk skulu tey øll hava.

Neistin ynskir Róa Berg Hansen hjartaliga vælkomnan heim og gleðir seg til samstarvið!

Neistin luttekur á Partille Cup annað hvørt ár. Í 2026 luttaka vit frá 29. juni til 4. juli, men eru í Gøteborg frá sunnudegnum 28. juni til sunnudagin 5. juli.

Um Partille Cup

Partille Cup er heimsins størsta altjóða ungdómshondbóltskapping. Kappingin er í Gøteborg í Svøríki. Hvørt ár luttaka uml- 25.000 luttakarar við 1.400 liðum frá 50 ymiskum londum. Høvuðssætið hjá Partille Cup eitur Heden. Heden liggur mitt í býnum og er savningardepilin fyri kappingina. Á Heden eru, umframt hondbóltsvallir, eisini leiðbeining, ítróttarhandil, mat- og sølubúðir og ymiskt undirhald.

Allir dystir verða spældir uttandura. Dystirnir verða spældir á Heden og í Kviberg, sum liggur í útjaðaranum av Gøteborg.

Tilsamans verða uml. 70 vallir nýttir til uml. 5.000 dystir. Partille Cup er ein sera væl skipað kapping og á høgum hondbóltsligum støði. Ungdómurin fær upplivilsir og minnir fyri lívið, bæði í gaman og álvara. Tey fáa stórar hondbóltsligar avbjóðingar, og fyri felagið Neistan og fyri tann einstaka leikaran, er hesin túrurin sera gevandi sosialt.

Nogv áhugavert um kappingina er at lesa her: https://partillecup.com/en

Hvør luttekur í Partille Cup

Neistin luttekur við aldursbólkunum frá U10 til U18. Liðini eru tilmeldaði árgang fyri árgang, tvs. U10, U11, U12, U13, U14 o.s.fr. Tað eru møguleikar fyri dispensatión, men tað er bert í undantaksstøðu og skal góðkennast av nevndini í Neistanum. Umbøn um dispensatión skal sendast til neistin@neistin.fo.

Treytin fyri, at ein neistaárgangur kann luttaka í Partille Cup er, at tað eru í minsta lagi 9 leikarar á liðnum + 1 venjari. Best er tó, um 10 leikarar eru á liðnum í alt. Um ikki ber til at manna ein árgang bara við Neistaleikarum, er møguleiki at leita eftir leikarum í øðrum feløgum fyri at manna liðið. Hetta er eisini bert í undantaksstøðu og skal somuleiðis góðkennast av nevndini í Neistanum. Umbøn skal sendast til neistin@neistin.fo.

Ferðing til Partille Cup

Leikarar við familju/avvarandi syrgja sjálvi fyri ferðini til Keypmannahavnar ella allan vegin til Gøteborg, um ynski er um tað.

Um undirtøka er fyri tí, skipar Neistin fyri bussi úr Keypmannahavn til Gøteborg sunnudagin 28. juni og úr Gøteborg til Keypmannahavnar sunnudagin 5. juli.

Meira kunning um hetta seinni.

Gisting i Gøteborg

Gist verður á einum skúla í Gøteborg. Vanliga hevur Neistin fingið ein skúla til øll okkum neistafólk – leikarar, venjarar og avvarandi. Tað er eisini umbiðið í ár, men skúlar verða ikki útlutaðir fyrr enn seinni í vár.

Liðleiðarar og venjarar

Tað er krav frá Partille Cup, at liðini hava liðleiðarar til hvørt lið. Liðleiðarar eru foreldur/avvarandi og kunnu ikki eisini vera venjarar. Neistin hevur hesar ásetingar um liðleiðarar:

• U10: 1 liðleiðara pr. barn
• U11-U13: 1 liðleiðara pr. 3 børn
• U14-15: 2 liðleiðarar pr. lið
• U16+: 1 liðleiðara pr. lið

Neistin ásetur harumframt venjarar til øll luttakandi liðini á Partille Cup.

Liðleiðarar skulu búgva á skúlanum saman við børnunum og hava ábyrgd av liðunum millum dystir.

Venjarin býr eisini á skúlanum, men vanliga búgva venjarar á skúlastovu fyri seg, uttan so at onkur venjari eisini er foreldur.

Hetta verður skipað, tá vit kenna endaligu luttøkuna.

Uppgávur hjá foreldrum og liðleiðarum

Uppgávurnar hjá liðleiðarunum/foreldrum eru t.d.:

• At syrgja fyri, at spælaraklæðir eru klár
• At syrgja fyri, at 2 bóltar eru í liðtaskuni. Kravdu bóltastøddirnar eru á finna her https://partillecup.com/en/document/tournament-regulations
• At eitt sett av vestum eru í liðtaskuni
• At hava ísposa, plástur o.a. við til dystir
• Kanna ferðaætlan til dystir
• Tryggja, at leikarar hava vatndunkar og drekka nokk áðrenn, undir og eftir dyst
• Hjálpa leikarar at halda avtalur um songartíð, máltíðir v.m.
• Hjálpa venjaranum, um tørvur er á tí
• Hugna og fjálga um liðið, so trivnaðurin er í hásæti

Uppgávur hjá venjarum

Venjarin hevur kunnleika til liðið og venur liðið áðrenn farið verður til Partille Cup. Á Partille Cup hevur venjarin ábyrgd av øllum tí hondbóltsliga rundan um dystin – upphiting, útskifting, taktikk o.s.fr.

Kostnaður og tíðarfreistir

Kostnaðurin fyri luttøku sæst her:  https://partillecup.com/en/costsfees

Umframt hesar kostnaðir, skulu liðini gjalda fyri venjaran, sum kemur við liðnum. Tað verður uml. 3.500-4.000 kr/pers tilsamans.

Samlaði kostnaðurin fyri hvønn einstakan verður gjørdur upp, tá vit kenna endaliga luttøkulistan.

Foreldraumboðini á hvørjum árgangi hava ábyrgdina av at heinta neyðugar upplýsingar og pening inn frá leikarum og avvarandi og síðani flyta hann til Neistan innan hesar freistir:

15. februar:

Liðini á øllum árgangum verða tilmeldað. Kostnaðurin er 240 EUR fyri hvørt lið.

1. mars:

Endalig persónlig tilmelding skal vera framd fyri øll luttakandi – leikarar, venjarar og avvarandi. Tilmeldingarskjal verður sent til liðini.

Eftir freistina ber til at rokna endaligt luttøkugjald út hjá hvørjum einstøkum luttakara.

1. apríl:

Endaligt luttøkugjald skal gjaldast.

Við í prísinum er innivist á skúla við øllum máltíðum frá mánakvøldinum 29. juni til frokost leygardagin 4. juli. Eyka gjald er fyri eyka nætur og madrassur við seingjarklæðum.

Eisini er ókeypis at koyra við bussi og sporvogni við Partille Cup passi og avsláttur til stuttleikaparkina, Liseberg.

Lesið meira her https://partillecup.com/en/the-partille-cup-pass

Praktisk kunning

Allir dystir verða leiktir úti á grasi ella graslíki. Tí verður mælt til at hava gaggur við.

Opening Ceremony, sjálv setanin av kappingini, er týskvøld í høllini, Scandinavium. Nakrir neistaleikarar eru við í skrúðgonguni. Nevndin tekur avgerð um, hvørji tey verða.

Bólkaspæl verður spælt týsdag og mikudag. Allar finalur verða spældar leygardag.

Øll lið spæla í minsta lagi 6 dystir. Dystirnir eru 2 * 15 minuttir, tó eru U18 og eldri 2 * 20 minuttir.

European Open, sum er ein U-landsliðskapping, verður leikt samstundis sum Partille Cup í Gøteborg. Í ár eru tað dugnaligu U16-kvinnurnar hjá Føroyum, sum luttaka. Fleiri evnaríkar neistakvinnur eru á landsliðnum, so vit gleða okkum eisini til at fylgja teimum.

Veitslan, Leaders Party, er fyri venjarar og liðleiðarar hóskvøld í Scandinavium.

Samansjóðingartiltak

Áðrenn vit øll fara til Partille Cup, verður skipað fyri einum samansjóðingartiltaki fyri allar leikarar, venjarar og familju.

Meira kunning um hetta seinni.

Pakkilisti

• Pass
• Ferðatrygging
• Evt. heilivág
• Hondbólt
• Vatndunk
• 2 handklæði
• Tannbust & tannkrem
• Shampoo & sápu
• Deodorant
• Sólbrillur
• Sólkrem & aftersun
• Shorts
• T-shirt
• Hosur +6 pør at spæla dyst í
• Undirklæðir
• Venjingarbuksir
• Hondbóltsskógvar
• Gaggir spælt verður uttandura á graslíki
• Sandalir
• Vanligar skógvar
• Svimjiklæðir
• Soviposa, um tað ikki verður bílagt
• Madrassu, um tað ikki verður bílagt.
• Lummapengar (Uml. 50 SEK um dagin)

Øll, sum eiga eina neistadrakt, ferðast í neistadrakt. Hetta ger tað nógv lættari at síggja og finna hvønn annan, tá vit ferðast.

Børnini koma at verða í spælaraklæðum fyri tað mesta gjøgnum dagin og í shorts- og/ella venjingarbuksum um kvøldarnar.

Væl ber til at svimja í Gøteborg, so tað verður viðmælt at hava svimjiklæðir við.

Hvar
Høllin á Hálsi, Gundadalshøllin, Badmintonhøllin og Fimi

Møtitíð
Kl. 09:30: Øll møta í Høllini á Hálsi fyrsta dagin
Venjingarnar byrja kl. 10:00

Hvat skulu børnini hava við

• Hondbóltsskógvar
• Egnan bólt
• Ítróttarklæðir
• Vatndunk
• Ryggsekk
• Gott lag 🙂

Bólkar

• Leikarar verða móttiknir av venjarum og liðleiðarum
• Børnini verða skipaði í hesar bólkar: G10, D10, G12, D12 og U14
• Bólkurin fylgist báðar dagarnar, og somu liðleiðarar eru saman við leikarunum allan tíðina

Yvirlit yvir dagsskránna

Ígjøgnum dagin rotera bólkarnir millum ymiskar venjingar og hallir, so børnini fáa eina fjølbroytta og læruríka uppliving við bæði spæli, rørslu og tekniskum venjingum. Liðleiðarar eru saman við bólkunum allan dagin og tryggja, at børnini flyta seg trygt og skipað millum hallirnar.

Í hvørjari høll er eitt venjaratoymi á 3-4 fólk, sum standa fyri venjingunum í tí høllini.

Ein nágreinilig skrá við yvirliti yvir venjingar og hallir verður løgd á heimasíðuna í døgunum áðrenn hondbóltsskúlin byrjar.

Matur

• Felags steðgur mitt á degnum í Høllini á Hálsi, har døgurði verður serveraður (vatn og Driv fylgja við)
• Frukt verður tøkt gjøgnum dagin í øllum hallunum
• Um onkur hevur allergi, vinarliga sendið boð til neistin@neistin.fo

Í góðum hondum

• Børnini flyta seg í bólkum saman við 2-3 liðleiðarum
• Ongin fer einsamallur millum hallirnar

Endi á degnum

• Fyrsta dagin enda leikararnir í tí høllini, har tey hava vant
• Seinna dagin enda øll í Høllini á Hálsi til felags avslutning og myndatøku
• Báðir dagarnir enda kl. 15:00

Um spurningar eru, eru tit vælkomin at skriva til neistin@neistin.fo ella ringja á tel 233500.

Skrá fyri hvønn aldursbólk

HH1 = Høllin á Hálsi 1
Skot og avslutningarvøllur

HH2 = Høllin á Hálsi 2
Avlevering og bóltførleiki

SV = Styrkirúmið á Hálsi
Styrkivenjing og skaðafyribyging

GH = Gundadalshøllin
Skjótálop og 1v1

BH = Badmintonhøllin
Kvikleki, agilitetur og javnvág

Fimi = Fimi
Stuttleiki og rørsla

fim	G10	G12	D10	D12	U14
Dagur 1
09.30	Øll møta á Hálsi
10:00–10:50	HH 2	GH	HH 1	Fimi	BH
11:00–11:50	HH 1	Fimi	HH 2	GH	BH
12:00–13:00	Øll eta í høllini á Hálsi
13:00–13:50	Fimi	BH	GH	HH 1	HH 2
14:00–14:50	GH	HH 1	Fimi	HH 2	SV
15:00 liðugt	Fyrsti dagurin endar í høllini tey hava vant
Dagur 2
9:45	Øll møta har tey skulu venja
10:00–10:50	BH	HH 2	GH	HH 1	Møta kl. 11
11:00–11:50	HH 1	HH 2	BH	GH	SV
12:00–12:45	Øll eta í høllini á Hálsi
12:45–13:25	HH 2	SV	BH	HH 1	GH
13:35–14:20	BH	HH 1	HH 2	SV	GH
14:30–15:00	Øll samlast í Høllini á Hálsi

Kom við á hondbóltsskúla hjá Neistanum 29.–30. desember 2025

Hondbóltskúlin verður í jólafrítíðini, og vit leggja stóran dent á góðsku, menning og stuttleika. Skúlin er ætlaður gentum og dreingjum í U10, U12 og U14.

• U10 og U12 har leggja vit stóran dent á spæl og trivnað, soleiðis at hesi børn fáa eina fjølbroytta og stuttliga uppliving. Vit leggja sjálvandi eisini dent á góðsku, grundleggjandi teknikk, lættari taktikk og at skilja spælið.
• U14 verður á hægri støði, og hesin aldursbólkurin fær eina meira málrættaða og seriøsa tilgongd. Vit leggja dent á posisjónsvenjing (málverji, bakkur, strika og vongur) og venja individuella tekniskar og taktiskar førleikar. Eisini fara vit at arbeiða við smálutum sum t.d. fintum, rørslum, timing og avgerðum.

Vit hava eitt sterkt og stórt venjaratoymi, sum er við til at tryggja góðskuvenjing til øll. Allir leikarar vera sæddir og hava møguleika fyri individuellum viðmerkjum frá kompetentum venjarum. Toymi er samansett av fleiri av okkara landsliðsaktuellu leikarum, sum spæla í øðrum londum, SMS/Burn leikarum, umframt okkara royndu venjarum í felagnum.

Hondbóltsskúlin verður frá kl. 10.00-15.00 báðar dagarnar, og prísurin er 650 kr.
íroknað mat og drekka.

Skrivað til okkum á neistin@neistin.fo um tú hevur spurningar

Keyp atgongumerki her
https://www.holdsport.fo/public_ticket_events/neistin-skipar-fyri-hondboltsskula

Tilsamans 35 venjarar fingu prógv í dag og hava nú stig 1.1 í venjaraútbúgvingini, sum HSF skipar fyri. Skeiðið er skipað við online-tilfari og trimum samlingum. Skeiðshaldarar vóru fakfólk hjá HSF og ÍSF.

Luttakarar frá Neistanum vóru: Ása H. Christiansen, Dánjal á Neystabø, Dávur Brøðarberg, Gunnvá Brockie, Halla Djurhuus, Janus Einar Sørensen, Pætur Jakobsen, Rakul Nolsøe, Rebekka á Neystabø, Rúni Gaardlykke, Tróndur Kragesteen, Unn Krákustein

Hjartaliga til lukku øll somul

Aftur í ár skipa vit í Neistanum fyri jólatræssølu.

Vit selja beint uttanfyri Gundadalshøllina.

Sølan byrjar týsdagin 9. desember og er fram til 20. desember.

Prísurin er úr 350 kr.

Vit gleða okkum at hjálpa tykkum at finna rætta træið

Soleiðis hava vit opið:

Gerandisdagar frá 15:00 – 19:00

Leygardagar frá 10:00 – 18:00

Sunudagar frá 14:00 – 18:00

Øll eru vælkomin at hugna sær, hoyra meira um Neistan og melda til.

Í Høllini á Hálsi frá kl. 15.30 til 22.00

Skráin:

Kl. 15.30 – Mini til U10

Børnini:

• Hugni í høllini
• Minihondbóltur og spøl saman við SMS/Burn leikarum
• Straffikapping móti Yui og Silju

Foreldrini:

• Avgreiða limagjald
• Fáa Holdsport at rigga
• Taka ímóti leikaraklæðum
• Keypa klædnapakka og vørur frá Sport24 við 20% í avsláttri

Kl. 17.30 – Øll saman

• Felags foreldrafundur í høll 1
• Neistin bjóðar øllum børnum og foreldrum døgurða

Kl. 19.00 – U12 til U16

Ungdómurin:

• Framløga um at mennast sum hondbóltleikari kropsliga, mentalt og sosialt
• Minibóltur og spøl saman við SMS/Burn leikarum
• Straffikapping móti Yui og Silju

Foreldrini:

• Avgreiða limagjald
• Fáa Holdsport at rigga
• Taka ímóti leikaraklæðum
• Keypa klædnapakka og vørur frá Sport24 við 20% í avsláttri

Soleiðis keypir tú kortið:

Tú kanst keypa kortið til heimadystir. Tað ber eisini til at senda ein teldupost til: neistin@neistin.fo – upplýs navnið sum skal standa á kortinum og flyt 1.000 kr. á 9181 403.205.7

Neistin ger 4-ára samstarvsavtalu við Sport24 og SELECT

Vit í Neistanum eru sera glað fyri, at vit hava gjørt eina nýggja 4-ára samstarvsavtalu við Sport24 og SELECT. Avtalan merkir, at øll liðini hjá Neistanum fáa nýggj góðskuklæðir frá SELECT – samstundis sum vit fáa enn sterkari samleika.

Øll børn og ung í Neistanum fáa ein ókeypis leikbúna við sínum egna nummari á.

Nýggju klæðini kunnu brúkast bæði til dystir og í frítíðini. Samstundis ber til at keypa fleiri sett og sjálvandi eisini frítíðarklæðir v.m.

Nýggju klæðini koma í handilin hjá Sport24 í SMS í september.

Á myndini sæst forkvinna okkara Helena Dam á Neystabø og Atli Mikkelsen frá Sport24.

Vit gleða okkum til nýggja kappingarárið í okkara nýggju búnum.

Dánjal Ragnarsson fer til Íslands og Nikolai Bliznov kemur til Neistan.

Í summar var kunngjørt, at Dánjal Ragnarsson kom aftur til Neistan, men støðan er nú broytt. Dánjal hevur fingið møguleikan at spæla í bestu íslendsku deildini við meistarunum og steypavinnarunum, Fram, komandi kappingarár.

Fram ynskir at leiga Dánjal í eitt kappingarár, og sjálvandi stuðla vit Dánjali í tí. Fram skal spæla bólkaspæl í European League, og tað er ein spennandi møguleiki, sum Dánjal hevur valt at taka av.

Samstundis sum Dánjal verður leigaður út, eru vit fegin um at bjóða bakspælaranum Nikolai Bliznov vælkomnan til Neistan.

Nikolai hevur leikt fimm kappingarár í Føroyum við ávikavist KÍF og Team Klaksvík, har hann hevur skorað yvir 400 mál. Nikolai hevur eisini spælt fleiri ár í bestu russisku deildini, har hann hevur vunnið bronsu tvær ferðir, eins og hann hevur vunnið russisku steypakappingina. Afturat hesum var hann liðskipari á russiska U19-landsliðnum.

Nikolai er 31 ára gamal og býr í Havn saman við unnustu síni, sum spælir við Stjørnuni. Vit ynskja Nikolai vælkomnan í Neistan og gleða okkum at síggja hann í Burn-hópinum í bláum við sínari styrki og royndum.

Nevndin